Friday, July 1, 2022

കോവിഡ് ബാധ വന്ന ശേഷം തലച്ചോറിനു എന്തു സംഭവിക്കുന്നു? ലോങ്ങ് കോവിഡ് അറിവുകൾ

 


Long Covid എന്ന പ്രതിഭാസത്തെക്കുറിച്ച് പുതിയ അറിവുകൾ

 

  കോവിഡ് വൈറസ് പ്രധാനമായും ശ്വാസകോശത്തെയാണ് ബാധിയ്ക്കുന്നത് എങ്കിലും നിരവധി ന്യൂറോളജിക്കൽ പ്രശ്നങ്ങൾ വന്നു ഭവിക്കാ റുണ്ട്. സംഭ്രാന്തി, പക്ഷാഘാതം നാഡീപേശിവ്യവസ്ഥാ ( neuromuscular) തകരാറുകൾ ഒക്കെ അസുഖത്തിൻ്റെ ഭാഗമാണ്. കൂടാതെ വ്യാധികളായ ഏകാഗ്രതക്കുറവ്, ചിന്താമന്ദത, വിഷാദരോഗം, കാഴ്ച്ച/കേൾവിക്കുറവ് ചിലപ്പോൾ സൈക്കോസിസ് വരെ വൈറസ് ബാധ വിട്ടുപോയിട്ടും മാസങ്ങളോളം നിലനിന്നേക്കാം. ഇതോടൊപ്പം  ഒരു കൂട്ടം മറ്റ് അസുഖങ്ങൾ ഇങ്ങനെ മിച്ചം നിൽക്കുന്നത് ‘Long Covid’ എന്നാണ് വിളിയ്ക്കപ്പെടുന്നത്. (Table 1 നോക്കുക).  ശരിയ്ക്കുള്ള വൈദ്യശാസ്ത്രപ്പേര്  “Post-acute sequelae of CoviD-19”  അല്ലെങ്കിൽ PASC എന്നാണ്.  യുവാക്കളിലും കോവിഡ് ബാധ തീവ്രമായിരുന്നില്ലെങ്കിലും neuropsychiatric ലക്ഷണസമഷ്ടി (syndrome)  ലോങ് കോവിഡിൻ്റെ  ഭാഗമായി കണ്ടു വരുന്നു.   അമേരിക്കയിൽ 230,000 കോവിഡ് വിമുക്തരിൽ മൂന്നിലൊന്ന് പേരിൽ സൈക്കിയാാട്രിക്കോ ന്യൂ  റോളജിക്കലോ ആയ അസുഖങ്ങൾ നിരീക്ഷിക്കപ്പെട്ടിട്ടുണ്ട്. ഇതിൻ്റെ രോഗനിദാനപശ്ചാത്തലം (pathophysiology) ഇപ്പോൾ പൂർണ്ണമായി ലഭ്യമല്ലെങ്കിലും ചില തെളിവുകൾ അനുമാനങ്ങളായി നിലവിലുണ്ട്. പ്രതിരോധവ്യവസ്ഥയിലെ പ്രവർത്തനപ്പിഴകൾ, പ്രധാനമായും കൃത്യതയില്ലാത്ത തലച്ചോർ നീർവീക്കം  (brain inflammation), നമ്മുടെ ന്യൂ റോണോകൾക്കെതിരെ നമ്മുടെ തന്നെ ഇമ്മ്യൂൺ സിസ്റ്റെം പ്രതിരോധം സ്രഷ്ടിയ്ക്കൽ ഒക്കെ ഈ തെളിവുകളിൽ ഉൾപ്പെടുന്നു. കോവിഡ് ബാധയ്ക്കു ശേഷം വർഷങ്ങൾ കഴിഞ്ഞാലും തലച്ചോർ പ്രശ്നങ്ങൾ ഉടലെടുക്കാൻ സാദ്ധ്യതകൾ ഉണ്ടോ എന്നും ആശങ്കപ്പെടുന്നുണ്ട്, ശാസ്ത്രലോകം. ഇപ്പോൾ മില്ല്യൺ കണക്കിനു ജനങ്ങൾക്കാണ് ഈ വൈറസ് ബാധ വന്നു ഭവിച്ചിരിക്കുന്നത്; നാഡീ വ്യവസ്ഥ ( nervous system) യുടെ പാകപ്പിഴകൾ, പ്രത്യേകിച്ചും തലച്ചോർ സംബന്ധിയായത് പൊതുജനരോഗ്യപരിപാലനത്തിനു വെല്ലുവിളി ആയിരിക്കയാണ്, പ്രത്യേകിച്ചും രോഗവിമുക്തിയ്ക്കും പുനരധിവാസത്തിനും.  ലോകത്താകമാനം തൊഴിൽ നിർവ്വഹണപ്രാപ്തിയിൽ  വൻ നഷ്ടം സംഭവിക്കുന്നു, ഇത് തൊഴിൽശക്തി (workforce) യിൽ വിള്ളൽ വരുത്തുന്നു  എന്ന ഗുരുതര സംഭാവ്യത ഭീതിദമാണ്.

 

  കോവിഡ് വൈറസ് ബാധയാൽ ബോധജ്ഞാനത്തിനും ഇന്ദ്രിയസംവേദനങ്ങൾക്കും മാറ്റങ്ങൾ വരുന്നത് ഏതൊരു അണുബാധയാലും സംഭവിക്കുന്നതു മാത്രമാണെന്നേ ആദ്യകാലനിരീക്ഷണങ്ങൾ തോന്നിപ്പിച്ചിരുന്നുള്ളു. പിന്നീടാണ് തലച്ചോറിലെ രക്തചംക്രമണത്തിലും  ന്യൂ റൽ റ്റിഷ്യുകളിലും വന്ന് ഭവിക്കുന്ന നാശോന്മുഖമായ മാറ്റങ്ങളെക്കുറിച്ച് കൂടുതൽ അറിവും തെളിവുകളും ലഭ്യമായത്. താമസിയാതെ ശ്വാസകോശത്തെ  കോവിഡ് വൈറസ് ബാധിക്കുന്നതിനൊപ്പം  പലേ അവയവവ്യവസ്ഥകളും (organ systems) താറുമാറാകുന്നു എന്ന് വ്യക്തമായി. കിഡ്നി, ഹൃദയം, ആമാശയവും കുടലുകളും മാത്രമല്ല, മസ്തിഷ്ക്കവും ഇതിൽപ്പെടുന്നു.  മണം നഷ്ടപ്പെടുക എന്നത് തലച്ചോർ ബാധയെ ആദ്യം സൂചിപ്പിച്ചു.  പക്ഷാഘാതം ( stroke), ഡെലീറിയം, തലച്ചോർ വീക്കം, മാനസിക വൈകല്യങ്ങൾ (psychiatric syndromes) മുതലായവ പലരിലും പ്രത്യക്ഷപ്പെട്ടു. ഇവയൊക്കെ അസുഖത്തിൻ്റെ പലഘട്ടങ്ങളിലാണ് പ്രത്യക്ഷപ്പെട്ടത് എന്നത് പല കാരണങ്ങളായിരിക്കും ഇതിനു പിന്നിൽ എന്ന അനുമാനത്തിൽ എത്തിച്ചേരാൻ പ്രേരകമായി. ശാസകോശത്തിൻ്റെ പ്രശ്നങ്ങൾ പ്രത്യക്ഷപ്പെടുന്നതോടു കൂടിയോ, അസുഖം ഭേദമായി ഉടനെയോ രണ്ടാഴ്ച്ച കഴിഞ്ഞോ ഈ ന്യൂ റൽ പ്രശ്നങ്ങൾ പ്രത്യക്ഷപ്പെടാൻ സാദ്ധ്യതയുണ്ടെന്ന് തെളിഞ്ഞിരിക്കുന്നത് കാരണങ്ങൾ കൃത്യമായി നിജപ്പെടുത്തുന്നതിൽ പ്രശ്നങ്ങൾ സൃഷ്ടിയ്ക്കുകയാണ്. മണം അറിയാനുള്ള നെർവുകൾ മൂക്കിനു മുകളിലൂടെ നേരെ തലച്ചോറിൽ എത്തുന്നതിനാൽ വൈറസ് ആ വഴി തലച്ചോറിൽ പ്രവേശിക്കാൻ സാദ്ധ്യതയുണ്ട്, അല്ലെങ്കിൽ രക്തത്തിൽ നിന്ന് നേരിട്ട്, ഒരു പ്രതിബന്ധം ഉള്ളത് (blood-brain barrier) തകർത്തുകൊണ്ട്  തലച്ചോറിൽ കയറിക്കൂടാനും മതി. പക്ഷേ കോവിഡിനു ശേഷം മാനസികപ്രശ്നമുള്ള ആരുടേയും തലച്ചോറിനുള്ളിലോ ചുറ്റുമുള്ള ദ്രവ (cerebrospinal fluid) ത്തിലോ വൈറസിൻ്റെ യാതൊരു സാന്നിദ്ധ്യവും കാണുന്നില്ല എന്നതാണു സത്യം.  കോവിഡ് ബാധയാൽ മരിച്ചവരുടെ തലച്ചോർ ടിഷ്യുവിലും വൈറസിൻ്റെ സാന്നിദ്ധ്യം ഇല്ല. എന്നാൽ പ്രതിരോധവ്യവസ്ഥയുടെ ചില തകരാറുകളുടെ സൂചനകൾ ഉണ്ടുതാനും. പക്ഷേ കോവിഡ് ബാധയാൽ മരിയ്ക്കുന്നവർ മിക്കവർക്കും മറ്റ് അസുഖങ്ങൾ ഉള്ളവരായതുകൊണ്ട് ഏത് അവയവത്തിലും പ്രശ്നങ്ങൾ കാണാൻ സാദ്ധ്യതയുണ്ട്, അവ വൈറസ് ബാധയാൽ മാത്രം ആകണമെന്നില്ല എന്നൊരു സാദ്ധ്യത തള്ളിക്കളയാറില്ല.

 

  പ്രതിരോധവ്യസ്ഥ സൃഷ്ടിയ്ക്കുന്ന തലച്ചോർ പ്രശ്നങ്ങൾ

   കോവിഡ് വൈറസ് ബാധിച്ചവരുടെ തലച്ചോർ ദ്രാവകം (cerebrospinal fluid, CSF.   ഇത് തലച്ചോറിനും സുഷുംനാകാണ്ഡത്തിനും ചുറ്റും ചംക്രമണം ചെയ്യുന്നു) പരിശോധിച്ചപ്പോൾ തെളിഞ്ഞത് ന്യൂറോ ഇമ്യൂൺ പ്രവർത്തനങ്ങളിൽ വൻ അപഭ്രംശങ്ങളാണ്. സാധാരണപ്രതിരോധപ്രവർത്തനത്തിൽ  വൈറസ് ഉള്ളിൽക്കയറിയ കോശങ്ങൾ പുറപ്പെടുവിപ്പിക്കുന്ന ഇൻ്റെർഫെറോൺ എന്ന പ്രോടീൻ മറ്റ് കോശങ്ങൾക്ക് അറിവു കൊടുക്കാൻ നിയോഗിക്കപ്പെട്ടതാണ്.  തലച്ചോറിലെ ചില പ്രതിരോധകോശങ്ങളിലെ ജീനുകൾ സി എസ് എഫ് ഇലുള്ള ഈ പ്രോടീൻ വഴി ഉണർത്തപ്പെടുകയാണ്. ഇതേ സമയം പ്രധാന പ്രതിരോധവാഹിയായ T കോശങ്ങൾ ഉണർത്തിയെടുക്കപ്പെടുന്നു, മറ്റൊരു വക കൊലപാതക കോശങ്ങളും (Natural killer cells) പ്രവർത്തനനിരതമാകുകയാണ്. രക്തത്തിൽ കാണാത്ത തരത്തിൽ പ്രതിരോധത്തിനു സഹായിക്കുന്ന രണ്ട് പ്രോടീനുകൾ -ഇൻ്റെർല്യൂകിൻ-1, ഇൻ്റെർല്യൂകിൻ-2 എന്നിവയുടെ അളവും ഈ തലച്ചോർ ദ്രാവക (CSF) ത്തിൽ അധികതരമാകുന്നുണ്ട്. എന്നാൽ രക്തത്തിൽ ഇവയുടെ അളവ് കൂടുന്നുമില്ല.  ഇതേ സമയം തലച്ചോ റിൽ റ്റികോശങ്ങളുടെ എണ്ണവും ക്രമാതീതമായി കൂടുന്നുണ്ട്. വൈറസിൻ്റെ സ്പൈക് പ്രോടീനിന്മേൽ പറ്റിപ്പിടിക്കുന്ന ചില ആൻ്റിബോഡികളും കാണപ്പെടുന്നു ഇതോടൊപ്പം എന്ന് മാത്രമല്ല ഈ ആൻ്റിബോഡികൾ ചില ന്യൂ റോണുകളിന്മേലും പറ്റിപ്പിടിക്കുന്നുണ്ട് (cross reaction of antibodies). ചില ന്യൂ റോണുകൾക്ക് പരിക്ക് പറ്റിയതിൻ്റെ ലക്ഷണങ്ങളും തലച്ചോർദ്രാവകത്തിൽ പ്രത്യക്ഷപ്പെടുന്നുണ്ട്. കോവിഡ് വ്യാധിയാൽ മരണപ്പെട്ടവരുടെ തലച്ചോർ പരിശോധനയിൽ നിന്ന് തെളിഞ്ഞത് പ്രതിരോധകോശങ്ങളുടെ വൻ കടന്നുകയറ്റം തലച്ചോറിൽ സംഭവിക്കുന്നതായാണ്. പുറമേ നിന്ന് എത്തുന്ന അണുക്കളെ വിഴുങ്ങുന്ന മാക്രോഫേജുംറ്റി കോശങ്ങളും ഇവയിൽപ്പെടുന്നു. കൂടാതെ തലച്ചോറിൽത്തന്നെയുള്ള വിഴുങ്ങൽ കോശങ്ങളായ മൈക്രോഗ്ളിയയും ഉണർന്ന് സജ്ജമാക്കപ്പെടുന്നുണ്ട്, ആസകലം.

 

        മറ്റൊരു സാദ്ധ്യത നാം നമ്മുടെ  പ്രോടീനുകൾക്കെതിരെ തന്നെ നിർമ്മിക്കുന്ന ആൻ്റിബോഡികളാണ്. ലൂപസ് എന്ന അസുഖവും വാതവും ഇപ്രകാരം നമ്മുടെ പ്രതിരോധ വ്യവസ്ഥ നമുക്കെതിരെ തിരിയുന്നതിൻ്റെ ഫലമാണ്. താറുമാറായ പ്രതിരോധവ്യസ്ഥ അല്ലെങ്കിൽ രൂക്ഷതരമായ പ്രതിരോധവ്യവസ്ഥ കൂടുതൽ നാൾ നീണ്ടുനിന്നാൽ നമുക്കുള്ളിൽ നാം തന്നെ ശത്രുവിനെ നിർമ്മിക്കാൻ ഇട വരികയാണ്.   പലപ്പോഴും കോവിഡ് വൈറസിനെതിരെ നമ്മുടെ പ്രതിരോധയുദ്ധം തീവ്രമാകുമ്പോൾ  ഇത് സംഭവിക്കാറുണ്ട്. ഇത്തരം autoimmune അപഭ്രംശങ്ങൾ തലച്ചോറിൽ സംഭവിക്കുക എന്നത് ഗുരുതരം തന്നെയാണ്. 

 

 മറ്റൊരു പഠനം ക്യാൻസർ കീമോതെറാപ്പി സമയത്ത് തലച്ചോറിനു സംഭവിക്കുന്ന പ്രശ്നങ്ങളുമായി താരതമ്യമുണ്ടോ കോവിഡ്ബാധയാൽ വരുന്ന ലക്ഷണങ്ങൾക്ക് എന്ന് പരിശോധിക്കുന്നതായിരുന്നു. കീമോതെറാപ്പി ചിന്താശക്തിയേയും ഓർമ്മയേയും ബാധിക്കാറുണ്ട്, കാരണങ്ങളും കണ്ടുപിടിച്ചിട്ടുണ്ട്. തലച്ചോ റിലെ ഇമ്മ്യൂൺ കോശങ്ങളായ മൈക്രോഗ്ളിയകൂടുതൽ നീർവീക്ക (inflammation)    സ്വഭാവത്തിലേക്ക് വ്യതിചലിക്കുന്നു, മറ്റ് നാഡീകോശങ്ങളുടെ പെരുമാറ്റത്തെ മാറ്റിമറിയ്ക്കുന്നു എന്നതൊക്കെ അറിയാം, കീമോതെറാപ്പിയുടെ പാർശ്വഫലങ്ങളായിട്ട്. ന്യൂറോണുകളുടെ നീണ്ട തന്തുക്കളെ പൊതിഞ്ഞ് ഇൻസുലേഷൻ കൊടുക്കുന്ന മയ് ലിൻ (myelin) നിർമ്മിച്ചെടുക്കുന്നതിൽ അപാകത വരുത്തുന്നു, പുതിയ ന്യൂ റോണുകൾ നിർമ്മിച്ചെടുക്കുന്നത് സാവധാനം ആകുന്നു, മറ്റ് കുറെ തലച്ചോർ കോശങ്ങൾ നശിപ്പിക്കപ്പെടുന്നുമുണ്ട്. പരീക്ഷണാത്മകമായി കോവിഡ് ബാധിപ്പിച്ച എലികളുടെ തലച്ചോറിൽ ഇതേ പരിവർത്തനങ്ങൾ കീമോതെറാപ്പി മരുന്നുകളാലും ഉളവാകുന്നു എന്ന് ഈയിടെ തെളിയിച്ചിരിക്കുന്നു. കോവിഡ് ബാധയാലും മൈക്രോഗ്ളിയ കോശങ്ങൾക്ക് ഇതേ പ്രശ്നങ്ങൾ സംഭവിക്കുന്നു. കോവിഡ് ബാധിച്ചു മരിച്ച രോഗികളുടെ തലച്ചോർ പരിശോധനയിൽ ഇതേ പ്രതിഭാസം നിരീക്ഷപ്പെട്ടു. എലികളുടെ രക്തത്തിൽ ഇമ്മ്യൂണിറ്റി അപഭ്രംശം ഉളവാക്കുന്ന ഒരു രാസവസ്തു (CCL11 ) കണ്ടുപിടിച്ചിട്ടുണ്ട്, ഇത് ബോധജ്ഞാന (cognition)ത്തെ ബാധിയ്ക്കുന്നതുമാണ് . ലോങ് കോവിഡ് അനുഭവിക്കുന്ന മനുഷ്യരുടെ രക്തത്തിലും ഈ CCL11   ൻ്റെ അളവ് കൂടിയതോതിൽ നിരീക്ഷിക്കപ്പെട്ടിട്ടുണ്ട്. പ്രതിരോധശക്തി തകിടം മറിക്കപ്പെടുമ്പോൾ അത് തലച്ചോ റിനെ ബാധിയ്ക്കുന്നു എന്നതിനു കൂടുതൽ തെളിവുകൾ ഇപ്രകാരം ലഭ്യമായിക്കൊണ്ടിരിക്കയാണ്.

 

എന്തുകൊണ്ട് തലച്ചോർ പ്രശ്നങ്ങൾ? 

       തലച്ചോറിലെ പലേ ന്യൂ റോണുകളേയും മറ്റ് കോശങ്ങളേയും വിശദമായി പരിശോധിച്ചിട്ടും കൊറോണ വൈറസിൻ്റെ ജനിതകവസ്തുവായ ആർ എൻ എ യുടെ സാന്നിദ്ധ്യം കണ്ടു പിടിയ്ക്കാൻ പറ്റിയിട്ടില്ല. ശക്തിമത്തായതും  തലച്ചോറിൽ ആകമാനം പ്രാവർത്തികമാകുന്നതുമായ പ്രതിരോധപ്രവർത്തനം കൊറോണ വൈ റസ് ബാധയുടെ അനുരണനമാണെന്ന് തീർച്ചയാണെങ്കിലും വൈറസിൻ്റെ അസാന്നിദ്ധ്യത്തിൽ ഇവിടെ അത് സംഭവിക്കുന്നു എന്നത് അമ്പരപ്പിക്കുന്നത് തന്നെയാണ്. തലച്ചോറിൽ വൈറസ് പെരുകുന്നതിൻ്റെ അടയാളങ്ങളൊന്നും കാണാനില്ലാാത്തെ വേളയിൽ ഇതെങ്ങനെ സംഭവിക്കുന്നു എന്നത് ഒരു വെല്ലുവിളിച്ചോദ്യമായി അവശേഷിക്കുന്നുണ്ട്.  ബാധയുടെ ആദ്യഘട്ടത്തിൽ ചെറിയ തോതിൽ തലച്ചോറിൽ താൽക്കാലികമായി ഈ വൈറസ് വന്നു കൂടിയതിൻ്റെ പരിണിതിയായ ആഘാതമാണോ എന്നും സംശയിക്കപ്പെടുന്നുണ്ട്.  വൈറസിൻ്റെ സ്പൈക് പ്രോടീനിൻ്റെ അംശങ്ങൾ തലച്ചോറിൽ പ്രവേശിക്കുന്നുണ്ടെന്നുള്ള പഠനങ്ങളുണ്ട് താനും. പ്രതിരോധവ്യവസ്ഥ രൂക്ഷമായ പ്രതിപ്രവർത്തനം സജ്ജമാക്കുമ്പോൾ രക്തം വഴി ആൻ്റിബോഡികളും ഇമ്മ്യൂൺ കോശങ്ങളും തലച്ചോർ കോശങ്ങൾക്കിടയിൽ എത്തി  അവിടെ ഒരു സംഘട്ടനാത്മകത നിർമ്മിക്കുകയാണ് എന്നതും ഒരു സാദ്ധ്യതയാണത്രെ.

 

    രക്തക്കുഴലുകൾക്ക് പലേ പരിക്കുകളും പറ്റുന്നുണ്ട് കോവിഡ് വൈറസ് ബാധയാൽ, ഇത് നേരത്തെ തന്നെ അ റിവുള്ളതുമാണ്. പക്ഷാഘാതം (stroke) സംഭവിക്കുന്നുണ്ട് പലേ കോവിഡ് രോഗികളിലും.  മറ്റ്  ഫ്ളു വൈറസുകളാൽ ഇത് സംഭവിക്കാറില്ല. രക്തക്കുഴലുകളിൽ സംഭവിക്കുന്ന നാശങ്ങളാണോ തലച്ചോറിൽ പക്ഷാഘാതത്തിനു കാരണമാകുന്നത്? അന്വേഷണം തുടരുകയാണ്. പ്രായം ഏറിയവരിലും കാർഡിയൊ വാസ്ക്കുലാർ അസുഖമുള്ളവരിലും തലച്ചോറിലെ രക്തക്കുഴലുകൾക്ക് ക്ഷതം സംഭവിക്കുന്നുണ്ടാകണം. രക്തക്കുഴലുകളുടെ വീക്കവും (vascular inflammation) രക്തക്കട്ടകൾ ഒഴുക്കു തടയുന്ന thrombosis ഉം അതുമൂലം ഓക്സിജെൻ കിട്ടാതെ നാശോന്മുഖമാകുന്ന ടിഷ്യുകളും കോവിഡ് രോഗികളിൽ നിരീക്ഷിക്കപ്പെട്ടിട്ടുമുണ്ട്. രക്തക്കുഴലുകളുടെ അകം പൊതിയുന്ന കോശങ്ങൾ (endothelial cells) ക്ഷയിച്ചു പോകുന്നത് ഒരു പരിണതിയാണ്. തലച്ചോറിൽ ഇത് സംഭവിച്ചാൽ ന്യൂറോണുകളുടെ പ്രവർത്തനം മന്ദീഭവിക്കുകയാണ്,  ചെറിയ തോതിൽ രക്തസ്രാവം ഉണ്ടായേക്കാം, ചില അവയവങ്ങളിൽ സംഭവിക്കുന്നുമുണ്ട്. മസ്തിഷ്ക്കത്തിലെ രക്തസ്രാവം ഗുരുതരമാണ്, പക്ഷാഘാതത്തിലേക്ക് നീങ്ങിയേക്കാം.

 

Long Covid കാരണങ്ങൾ- നിഗൂഢതകൾ ഏറെ 

   ആരൊക്കെയാണ്, എന്തുകൊണ്ടാണ് ഇതിനു വശംവദരാകുന്നത്? ചിലർ മറ്റുള്ളവരെ അപേക്ഷിച്ച് കൂടുതൽ ആപൽഘട്ടത്തിൽ പെട്ടുപോകുന്നില്ലെ? കോവിഡ് അസുഖം വന്ന് പോയിട്ടും ശാരീരികമോ മാനസികമോ ന്യൂറോളജിപരമോ സവേദനാത്മകമോ ബോധജ്ഞാനപര (cognitive)മോ ആയ പ്രത്യാഘാതങ്ങൾ ഉളവാകുന്നതും വിട്ടുപോകാതെ മാസങ്ങളോളം നിലനിൽക്കുന്നതും  എന്തുകൊണ്ട് പലരിലും പല തീവ്രതയിൽ അനുഭവപ്പെടുത്തുന്നു? പെട്ടെന്ന് ഉത്തരമില്ലാത്ത ലോങ് കോവിഡ് ചോദ്യങ്ങളാണിവ.

 

    കോവിഡ് ബാധയിൽ നിന്ന് വിമുക്തരായവർക്ക് പലർക്കും അവരുടെ പഴയ ജീവിതം തിരിച്ചു പിടിയ്ക്കാൻ സാധിക്കാതെ വരുന്നു എന്നത് ഇന്ന് ലോകത്തെമ്പാടും അറിയപ്പെടുന്ന കഷ്ടസ്ഥിതിവിശേഷമാണ്. പലതും ന്യൂറോളജിപരമായതും സൈക്കിയാട്രിക്കുമാണ്, സംശയമില്ല. ഓർമ്മയുടെ പ്രശ്നങ്ങൾ, ഏകാഗ്രതയില്ലായ്മ, ദൈനന്ദിനപ്രവർത്തികളിൽ മന്ദത, പലതും സാധിച്ചെടുക്കാനാവാതെ വരിക, തലവേദന, ത്വക്കിൻ്റെ സംവേദനക്ഷമതയിലെ അപാകതകൾ, ശ്വാസവേഗത്തിലോ ഹൃദയമിടിപ്പിലോ ദഹനവ്യവസ്ഥയിലോ ക്ഷതിദോഷങ്ങൾ (ഇത് സ്വയം നിയന്ത്രിതമായ നാഡീവ്യവസ്ഥ ( autonomic nervous system ) യുടെ തകരാറുമൂലമാണ്), പെട്ടെന്നുള്ള തളർച്ച ഒക്കെ ലോങ് കോവിഡിൻ്റെ ലക്ഷണമാണ്. ഗുരുതരമാകുമ്പോൾ  മതിവിഭ്രമം (delusions), മിഥ്യാവിഭ്രാന്തി     (paranoia) ഇവയിലൊക്കെ എത്തിപ്പെട്ടേയ്ക്കാം. പലരും 50 വയസ്സിൽ താഴെ ഉള്ളവരും ഇത്തരം പ്രശ്നങ്ങളൊന്നുമില്ലാതെ സാധാരണജീവിതം നയിച്ചിരുന്നവരുമാണ്.  ലക്ഷണങ്ങൾ പലർക്കും പലതാണ് എന്നത് അസുഖത്തിൻ്റെ ഉറവിടകാരണങ്ങൾ കണ്ടുപിടിയ്ക്കുന്നതിൽ വൈഷമ്യങ്ങൾ ഏറ്റുന്നു. കോവിഡ് ബാധയാൽ മാത്രം ഉത്പന്നമാകുന്നതും നേരത്തെ ഉണ്ടായിരുന്ന ന്യൂ റോ/കാർഡിയോ വാസ്കുലാർ പ്രശ്നങ്ങൾ അധികതമമാകുന്നതും വേർതിരിച്ചറിയാൻ സാധിയ്ക്കുന്നില്ല എന്നതും വെല്ലുവിളിയാണ്, ചികിൽസ നിശ്ചയിക്കാൻ പ്രയാസമാകുകയുമാണ്. പലേ പഠനങ്ങളുടേയും ഫലങ്ങൾ അ റിഞ്ഞു വരുന്നതേ ഉള്ളു. 3762 പേരേ ഉൾപ്പെടുത്തിയുള്ള ഒരു പഠനത്തിൽൽ കോവിഡ് ബാധയ്ക്കു ശേഷം ഏഴു മാസത്തോളം ലോങ് കോവിഡ് ലക്ഷണങ്ങൾ ഉണ്ടായിരുന്നത്രേ, ചിലർക്ക് സൈക്കിയാട്രിക് പ്രശ്നങ്ങളും. സ്കാനിങ് ഇമേജുകൾ തലച്ചോ റിലെ ചില ഇടങ്ങളിൽ അപക്ഷയം ( brain atrophy ) വ്യക്തമാക്കുന്നുണ്ട്. PET imaging വെളിവാക്കുന്നത്  തലച്ചോറിലെ ഇടങ്ങളിലെ ചയാപചയവ്യസ്ഥ (metabolic activity)  യിലെ ന്യൂനതകളാണ്. 

 

    തീവ്രതരമായ കോവിഡ്ബാധയാൽ  ന്യൂ റോണുകൾക്ക് സംഭവിക്കുന്ന നീർവീക്കവും (neuroinflammation) ക്ഷതവും  (neuronal injury) ചിലപ്പോൾ മറ്റ് പ്രത്യാഘാതങ്ങളിലേക്ക് നയിച്ചേയ്ക്കാം:ന്യൂ റോണുകളുടെ അപകർഷങ്ങൾ (neurodegeneration) ആക്കം കൂട്ടപ്പെടുകയോ പുതുതായിട്ട് ഉടലെടുക്കുകയോ ചെയ്യാം. ആൽസൈമേഴ്സ്, പാർകിൻസൺസ് മുതലായ രോഗങ്ങൾ ആണ് വന്നുഭവിക്കാൻ സാദ്ധ്യതയുള്ളവയുടെ ഉദാഹരണങ്ങൾ. കൂടുതൽ നിരീക്ഷണങ്ങളും പഠനങ്ങളും ആവശ്യമായ മേഖല ആണിത്. കുട്ടികളിൽ കോവിഡ്-19   പിന്നീട് ന്യൂറോപ്രശ്നങ്ങൾ സ്രഷ്ടിയ്ക്കുന്നുണ്ടോ എന്നതും ഗൗരവമായി വീക്ഷിക്കേണ്ടിയിരിക്കുന്നു.

 

  ലോങ് കോവിഡ് തടയാൻ സാദ്ധ്യതകൾ?

  വളരെ അടുത്ത നാളുകളിൽ നടന്ന ചില പഠനങ്ങൾ ലോങ് കോവിഡ് വരാനുള്ള സംഭാവ്യതകൾ നേരത്തെ പ്രത്യക്ഷപ്പെടുന്നുണ്ടെന്നും അവ ആദ്യമേ തന്നെ തിരിച്ചറിഞ്ഞാൽ ചില ചികിൽസകൾ സാദ്ധ്യമാവുമെന്നും തെളിയിക്കുന്നു. വൻ വഴിത്തിരിവാണ് ഈ നിരീക്ഷണങ്ങൾ സംജാതമാക്കിയിട്ടുള്ളത്. സിയാറ്റിലിലെ ഇൻസ്റ്റിറ്റ്യൂട് ഫോർ സിസ്റ്റെം ബയോളജിയിലെ ജെയിംസ് ഹീത്, സിയാറ്റിലിലെ തന്നെ ഫ്രെഡ് ഹച്ചിസൺ ക്യാൻസർ സെൻ്ററിലെ ജെയ്സൺ ഗോൾഡ്മാൻ എന്നിവർ മറ്റ് 74 ഓളം ശാസ്ത്രജ്ഞരുമായി ഒത്തു ചേർന്ന് വിപുലമായ ഡാറ്റ ശേഖരം വിശ്ളേഷണം ചെയ്താണ് ഈ നിഗമനങ്ങളിൽ എത്തിയത്. 2022 ജനുവരി 24 ഇൽ പ്രസിദ്ധീകരിച്ച സെൽജേർണലിലാണ് ഈ പഠനഫലങ്ങൾ പ്രസിദ്ധീകരിച്ചത്. 200ഇൽപ്പരം കോവിഡ് രോഗികളെ മൂന്നു മാസത്തോളം നിരീക്ഷിച്ച് അവരിൽ നിന്ന് ലഭിച്ച സൂക്ഷ്മവിവരങ്ങളാണ് ഈ പഠനത്തിൽ. കോവിഡ് ബാധക്കാലത്ത് ശ്രദ്ധിക്കപ്പെടാവുന്ന നാല് ഘടകങ്ങൾ പിൽക്കാലത്ത് ലോങ് കോവിഡ് വരുന്നതിൻ്റെ മുൻ സൂചനകൾ ആയി പ്രഖ്യാപിക്കുകയാണ് ഈ ശാസ്ത്രജ്ഞർ. ലോങ് കോവിഡിൻ്റെ ജീവശാസ്ത്ര പ്രവർത്തവിധത്തിൻ്റെ പശ്ചാത്തലം വിശദമാക്കുന്ന ആദ്യത്തെ പഠനം തന്നെ ഇത്. ഓരോന്നും വൈറസ് ബയോളജിയിൽ അറിവുള്ള വസ്തുതകളുമായി ഒത്തു പോകുന്നതാണ്, മറ്റ് ശാസ്ത്രജ്ഞർ പിന്തുടരുന്ന സിദ്ധാന്തങ്ങൾക്ക് അനുകൂലപരമാണ്, ആത്യന്തികമായി വ്യവഹാരനുയോജ്യവുമാണ്.

 

   കോവിഡ് രോഗം വരുമ്പോൾത്തന്നെ ഈ നാല് ഘടകകാരണങ്ങളെ പ്രതിരോധിയ്ക്കാനുള്ള വഴികൾ തേടിയാൽ പിന്നീട് ലോങ് കോവിഡ് തടയാനുള്ള സാദ്ധ്യത തെളിയുകയാണ്.

 താഴെപ്പറയുന്നവയാണ് ആ നാലു സൂചകങ്ങൾ

  1. രക്തത്തിലെ കോവിഡ് വൈറസിൻ്റെ ജനിതകവസ്തുവായ ആർ എൻ എ (RNA) യുടെ അളവ്. ശരീരത്തിനുള്ളിൽ  വൈറസിൻ്റെ നിറവിൻ്റെ (viral load) അടയാളമാണിത്.
  2. നമ്മുടെ തന്നെ പ്രോടീനുകളെ തെറ്റിദ്ധരിച്ച് അവയ്ക്കെതിരെ  പ്രതിരോധവ്യവസ്ഥ നിർമ്മിച്ചെടുക്കുന്ന ആൻ്റിബോഡികൾ. Autoantibodies എന്നറിയപ്പെടുന്നു ഇവ. Autoimmunity എന്ന പ്രതിഭാസം.
  3. നമ്മുടെ ശരീരത്തിൽ പണ്ടേ കയറിക്കൂടി ഉറങ്ങുന്ന എപ്സ്റ്റീൻ ബാർ വൈറസ് (Epstein-Barr Virus) ഉണർന്നു വരുന്നത്
  4. പ്രമേഹവും മറ്റ് ചില രോഗങ്ങളും.

 

 ഈ നാലു സൂചകങ്ങളിൽ ഏതെങ്കിലും ഒന്നോ രണ്ടോ കൂടിയ അളവിൽ കോവിഡ്  ബാധാസമയത്ത് നിരീക്ഷിക്കപ്പെടുകയാണെങ്കിൽ അതിനു ശേഷം ലോങ് കോവിഡ് വന്നു ഭവിയ്ക്കാൻ ഇടയാകുന്നത്രേ. സുപ്രധാനമായ കാര്യം ഇത്തരം അറിവുകൾ കോവിഡ് ബാധ വരുമ്പോൾത്തന്നെ എന്തെങ്കിലും ചികിൽസ തുടങ്ങാനുള്ള സാദ്ധ്യതയേറ്റുന്നു എന്നുള്ളതാണ്. ഈ ഗവേഷണത്തിലെ പ്രധാന ശാസ്ത്രജ്ഞനായ ഡോ. ഹീത് പറയുന്നത് ഇങ്ങനെ: ഞങ്ങൾ ഈ അനാലിസിസ് ചെയ്തതിൻ്റെ കാരണം ഇതാണ്. കോവിഡ് രോഗി ഡോക്റ്ററോട് എപ്പോഴും ക്ഷീണമാണെന്ന് പറയുമ്പോൾ കൂടുതൽ വിശ്രമിക്കാനും ഉറങ്ങാനും ഡോക്റ്റർ ഉപദേശിക്കും. അത് ഒട്ടും സഹായകമല്ല. അതുകൊണ്ട് കൃത്യമായി അളക്കാവുന്ന ലക്ഷണങ്ങൾ അറിഞ്ഞ്, ഈ രോഗിയ്ക്ക് ചില പ്രശ്നങ്ങൾ ഉണ്ടെന്ന് നിശ്ചയമായി പറയാൻ സാധിയ്ക്കുന്ന സാഹചര്യം ആവശ്യമാണെന്ന് ഞങ്ങൾ കരുതി“.

 

       18 മുതൽ 89വയസ്സു വരെ പ്രായമുള്ള 209 രോഗികളെ 2020 ഇലും 2021 ഇലും മൂന്നുമാസത്തിൽക്കൂടുതൽ കൃത്യമായി നിരീക്ഷിച്ചാണ് ഈ അനുമാനങ്ങൾ സാദ്ധ്യമാക്കിയത്. ലോങ് കോവിഡിൽ കാണപ്പെടുന്ന 20 ലക്ഷണങ്ങളാണ് പഠിയ്ക്കപ്പെട്ടത്-അതിയായ ക്ഷീണം, തലച്ചോർ മന്ദതയോ അവ്യക്തതയോ (brain fog എന്ന് അറിയപ്പെടുന്നത്), ശ്വാസം മുട്ടൽ ഇവയൊക്കെ ഉൾപ്പെട്ടു, ഇതിൽ. 37 ശതമാനം രോഗികൾക്ക് മൂന്നോ നാലോ ലോങ് കോവിഡ് ലക്ഷണങ്ങൾ ഉണ്ടായിരുന്നു, 24 % രോഗികൾക്ക് ഒന്നോ രണ്ടോ ലക്ഷണങ്ങൾ, 39 ശതമാനത്തിനു ലക്ഷണങ്ങൾ ഒന്നുമില്ലാത്തവരും ആയിരുന്നു. മൂന്നോ അതിൽക്കൂടുതലോ ലോങ് കോവിഡ് ലക്ഷണങ്ങൾ ഉള്ളവരിൽ 95% ഇനു ഒന്നിൽക്കൂടുതൽ മേൽപ്പറഞ്ഞ സൂചകങ്ങൾ അവരുടെ കോവിഡ് കാലത്ത് നിരീക്ഷിക്കപ്പെട്ടിരുന്നു.  ലോങ് കോവിഡ് വരാനുള്ള സാദ്ധ്യതയേറ്റിയതിൽ പ്രധാനം autoantibodies ഉണ്ടാകുക എന്നതായിരുന്നു;   മൂന്നിൽ രണ്ട് ഭാഗം ലോങ് കോവിഡ് രോഗികളിൽ ഇത് കാരണമായി ഭവിച്ചിരുന്നു.  പ്രതിരോധവ്യവസ്ഥയുടെ ഉന്നം തെറ്റിപ്പോകുന്ന ഈ അവസ്ഥയിൽ വൈറസിനെ ചെ റുക്കാനുള്ള ആൻ്റി ബോഡികൾ നിർമ്മിക്കുന്നത് കുറയുന്നുണ്ട്, ഇത് വൈറസ് ഒഴിഞ്ഞു പോകാതിരിക്കാൻ കാരണമായേക്കാം, അല്ലെങ്കിൽ വീണ്ടും ഒരു വൈറസ് ബാധയ്ക്ക് പശ്ചാത്തലം ഒരുക്കിയേക്കാം. മാത്രമല്ല, ലോങ് കോവിഡിൻ്റെ തീക്ഷ്ണതയും ഗുരുതരമായേക്കാം എന്നും അനുമാനങ്ങളുണ്ട്.

 

   ഒരു പ്രധാന തീർപ്പ് അണുബാധ വരുമ്പോഴുള്ള വൈറസ് നിറവ് ( viral load) പിന്നീട് ലോങ് കോവിഡ് വരാനുള്ള സാദ്ധ്യതയേറ്റുന്നു എന്നതിനാൽ നേരത്തെ തന്നെ  വൈ റസുകളെ പ്രതിരോധിയ്ക്കാനുള്ള മരുന്നുകൾ (antivirals)  നൽകിയാൽ ലോങ് കോവിഡിൻ്റെ രൂക്ഷത ഗണ്യമായി കുറയ്ക്കാം എന്നതാണ്.   വൈറസിൻ്റെ എണ്ണം കുറയ്ക്കുമ്പോൾ autoimmunity (നമുക്കെതിരെ തന്നെ പ്രവർത്തിയ്ക്കുന്ന ഇമ്മ്യ്യൂൺ സിസ്റ്റെം) ഉളവാകുന്നതിനേയും നേരിടാം. നമുക്കുള്ളിൽ പണ്ടേ വസിയ്ക്കുന്ന എപ്സ്റ്റീൻ ബാർ വൈറസ് ഉണർന്ന്  പ്രവർത്തിക്കുന്നതിനെ തടയിടുമ്പോൾ മറ്റ് പല തജ്ജന്യമായ അസുഖങ്ങളുടെ സാദ്ധ്യതയും കുറയുകയാണ്. ന്യൂ റോണുകളുടെ പ്രവർത്തനം മന്ദീഭവിപ്പിക്കുന്ന മൾറ്റിപ്പിൾ സ്കീളോറോസിസിനു  ഈ വൈറസ് ആണ്  പ്രധാന കാരണക്കാരൻ. നീണ്ടു നിൽക്കുന്ന അതിയായ ക്ഷീണത്തിനും (ഒരു ലോങ് കോവിഡ് ലക്ഷണം) ഒരു കാരണം എപ്സ്റ്റീൻ ബാർ വൈറസ് ആണ്. ഈ വൈറസിനെ നേരിടാൻ ഇമ്മ്യൂണോതെറാപ്പിയും ഉപയുക്തമായേക്കാം.

 

   ജിജ്ഞാസ ഉണർത്തുന്ന മറ്റൊരു വെളിപാട് ആയിരുന്നു കോവിഡ് ബാധാ സമയത്ത് കോർടിസൊൾ എന്ന ഹോർമോണിൻ്റെ അളവ് കുറയുന്നു എന്നത്. ആത്മസംഘർഷ ( stress)ത്തെ നിയന്ത്രിക്കുന്ന ഹോർമോൺ ആണിത്. കോർടിസൊൾ തെറാപ്പി ചില ഡോക്റ്റർമാർ പരീക്ഷിച്ചു തുടങ്ങിക്കഴിഞ്ഞു. മറ്റൊരു കൗതുകകരമായ കണ്ടുപിടിത്തം ലോങ് കോവിഡ് ഉള്ളവരിൽ ചിലരുടെ രക്തത്തിൽ  ഉറക്കം/ഉണർവ് ചാക്രികത (sleep/wake cycle) യെ നിയന്ത്രിക്കുന്ന പ്രോടീനുകൾ കാണപ്പെട്ടു എന്നുള്ളതാണ്. ചില ന്യൂറോളജിക്കൽ പ്രശ്നങ്ങൾക്ക് കാരണം ഇതായിരിക്കുമത്രെ.

 

  മേൽച്ചൊന്ന നാലു സൂചകങ്ങളും ഒന്ന് മറ്റൊന്നിനെ കുറുകെ കടക്കുകയോ  മറ്റൊന്നിനുമേൽ അതിവ്യാപിക്കുകയോ ചെയ്തേക്കാം. ഇത് വ്യഞ്ജിപ്പിക്കുന്നത് ഋജുവായ രീതിയിൽ ലോങ് കൊവിഡിനെ കാലേകൂട്ടിത്തടയാമെന്നാണ്. കോവിഡ് ബാധക്കാലത്തു തന്നെ ഈ ലക്ഷണങ്ങൾ തിരിച്ചറിയേണ്ടതുണ്ട്, മാസങ്ങൾക്ക് ശേഷം, ലോങ് കോവിഡ് സമയത്ത് ഇവ അവ്യക്തമായിരുന്നേക്കാം. ആദ്യം ലക്ഷണങ്ങൾ ഏതൊക്കെ എന്ന് തിരിച്ചറിയേണ്ടിയിരിക്കുന്നു, ചികിൽസ തുടങ്ങേണ്ടിയിരിക്കുന്നു, ലോങ് കോവിഡീനെ പ്രതിരോധിയ്ക്കാൻ.

 

   സുവ്യവസ്ഥിതമായ ന്യൂറോളജിക്കൽ/പ്രതിരോധവ്യവസ്ഥാ പഠനങ്ങൾ  അത്യാവശ്യമായിരിക്കുന്ന വേളയാണിത് എന്ന് സയൻസ് മാഗസീനിൽ ഡൊ. സെ റീന സ്പൂഡിച്ചും ഡോ. അവീന്ദ്രനാഥും എഴുതുന്നു. ലോങ് കോവിഡ്  രോഗികൾ മിക്കപ്പോഴും അപമാനമേൽക്കേണ്ടി വരുന്നു, ജോലിയിൽ സ്ഥിരത ഇല്ലാതാകുകയോ ജോലി ലഭിയ്ക്കാൻ പ്രയാസപ്പെടുകയോ ചെയ്യുന്നു, സ്വന്തം മാനസികപ്രശ്നങ്ങൾക്കുപരിയായിഎന്ന് അവർ നിരീക്ഷിക്കുന്നു. രോഗനിർണ്ണയത്തിൽ നിശ്ചിതത്വം ഉറപ്പാക്കേണ്ടതുണ്ട്, ചികിൽസാപരമായ ഇടപെടലുകൾ നടത്തേണ്ടതുമുണ്ട്, തീർച്ചയായും. 2021 ജൂണിൽത്തന്നെ യു കെയിൽ ഒന്നേകാൽ മില്ല്യൺ ആൾക്കാരിലാണ് ലോങ് കോവിഡ് നിരീക്ഷിക്കപ്പെട്ടത്. മാനസികവും ശാരീരികവുമായ പ്രശ്നങ്ങളുള്ള ഒരു ജനതയാണ് സൃഷ്ടിക്കപ്പെട്ടിരിക്കുന്നത് ഇപ്പോൾ. അദൃശ്യമായ മഹാമാരി‘(hidden pandemic) എന്നാണ് പുതിയ പേര് ഈ പ്രതിഭാസത്തിനു. ലോക ജനത അഭിമുഖീകരിക്കുന്ന ഈ ബ്രഹുത്തായ പൊതുജനാരോഗ്യപ്രശ്നം ലോകത്തെ മൊത്തം വ്യവഹാരങ്ങളെ ബാധിക്കാൻ പോന്നതാണ്.

 

References

1. Spudich, S. and Nath A. Nervous system consequences of COVID-19.  Science 375: 267-269  2022

2. Su, Y. and 75 others including Goldman J. D. and Heath J. R. Multiple early factors anticipate post-acute COVID-19 sequelae. Cell. Jan 2022. Online publication.  https://doi.org/10.1016/j.cell.2022.01.014

3. Belluck, P. New research hints at 4 factors that may increase chances of long Covid.  The New York Times, Jan 25, 2022

4. Davis H. E., Assaf G. S/, McCorkell L., Wei H., Low R. J., Re’em Y., Redfield S., Austin J. P. and Akrami A.  Characterizing long COVID in an international cohort: 7 months of symptoms and their impact. EClinical Medicine 38,101019 2021

 

 

 

Table 1. ലോങ് കോവിഡ് ലക്ഷണങ്ങൾ. (From reference 4)

 

 

Wednesday, May 11, 2022

മലയാളസിനിമ-ഒരു കോവിഡ് കാലനോട്ടം - പുതിയ സംവിധായകരുടെ തൻ്റേടങ്ങൾ, പഴയ സംവിധായകരുടെ ‘ആ റാട്ട്‘ നേട്ടങ്ങൾ

 

  

       അതതുകാലത്തെ സമൂഹമാനസികാവസ്ഥയാണ് കലാസൃഷ്ടികളെ സ്വീകാര്യമാക്കുന്നത്. സിനിമയുടെ കാര്യവും ഇതിൽ ഉൾപ്പെടും. പൊതുബോധത്തിൻ്റെ താൽപ്പര്യങ്ങളെ മാനിച്ചാണ് സിനിമ പോലെ ജനമദ്ധ്യത്തിലേക്ക് പരത്തിയിറക്കുന്ന കല സാർത്ഥകമാക്കുന്നത്. പ്രക്ഷുബ്ധമായ മനസ്സിനു അതിനു യോജിച്ച കുളിർമ്മയാർന്ന കലാംശങ്ങൽ കലർത്തേണ്ടതുണ്ട്. 

     കോവിഡ് മഹാമാരി ഏറ്റവും ബാധിയ്ക്കപ്പെട്ട കല സിനിമ തന്നെ, ലോകമാസകലം. വാണിജ്യപരവുമായതിനാൽ ഇടിവ് വന്ന വൻവ്യവസായങ്ങളിൽ മുൻപൻ. ഇൻഡ്യയിലാണെങ്കിൽ പ്രധാന വിനോദോപാധി തന്നെ സിനിമ. കോവിഡാനന്തര സിനിമയിൽ പ്രധാനമായും ഊന്നൽ കൊടുക്കേണ്ടത് ശുഭാപ്തിവിശ്വാസം ഉറപ്പിക്കുന്നതും ശുഭോദർക്കമായ പരിണതി ഉദ്ദേശിച്ചുള്ളതും ആയ കഥയും ഉന്മേഷദ്യോതകമായ കഥാന്ത്യവും ആണെന്നുള്ളത് സിനിമ നിർമ്മിച്ചെടുക്കുന്നവർക്ക് വേണ്ടുന്ന മിനിമം അറിവ് ആണ്. നിപ വൈറസ് ബാധയ്ക്കു ശേഷം ആ വൈറസിൻ്റെ ഉറവിടവും പകർച്ചാ ചരിത്രവും കോഴിക്കോട് ഭാഗത്ത് അതിനെ ചെറുക്കാൻ ചെയ്ത യത്നങ്ങളും എല്ലാം ചേർത്ത് സിനിമ (വൈ റസ്“, ആഷിക് അബു)   ഇറങ്ങിയിരുന്നു. ഇന്ന് അങ്ങനെ ഒരു സിനിമ കോവിഡ് വൈറസിനെക്കുറിച്ച് ഇറങ്ങാൻ സാദ്ധ്യതയേ ഇല്ല. കോവിഡിൻ്റെ പ്രഹരം ആഴത്തിൽ പതിഞ്ഞതാണ്, അപരിമേയമായ കെടുതികളിൽ നിന്നുള്ള ആഘാതം ആരേയും വിട്ടു പോയിട്ടുമില്ല.  2021 പകുതിയ്ക്ക് ശേഷവും 2022 ഇലും ഇറങ്ങിയ സിനിമകൾ ഇത്തരം ആഖ്യാനങ്ങളിൽ നിന്ന് വിട്ടു നിന്നിട്ടുണ്ട് പൊതുവേ. ചില അപവാദങ്ങൾ ഇല്ലെന്നല്ല. ഒരു വിനോദോപാധി എന്ന നിലയ്ക്കാണു സിനിമയുടെ പൊതു സ്വീകാര്യത എങ്കിലും കലാംശം ഏറെ മുമ്പിൽ നിന്നേയ്ക്കാം പലപ്പൊഴും. പക്ഷേ ഒരു മഹാമാരി സമയത്തോ അതിനു ശേഷമോ പ്രേക്ഷകർക്ക് വേണ്ടത് ആനന്ദദായകവും ശുഭോദർക്കവും ആയ പ്രമേയദൃശ്യങ്ങളാണ്.  

         2020 ഇൽ പൊടുന്നനവേ ആണ് പലേ സിനിമകളുടേയും  ഷൂടിങ് നിന്നു പോയത്. പലേ സിനിമകളും പിന്നീട് തുടരാൻ ഭാഗ്യം കിട്ടിയവയുമല്ലായിരുന്നു. തുടരാൻ സാധിച്ചവ പെട്ടെന്ന് മാറിയ പരിസ്ഥിതിയോട് ഇണങ്ങുന്ന വിധം ചിട്ടപ്പെടുത്തുകയാണുണ്ടായത്. ഷൂടിങ് ഇടങ്ങളുടെ പരിമിതിയിൽ രംഗങ്ങൾ മാറ്റി എഴുതപ്പെടേണ്ടി വന്നിട്ടുണ്ട്, കഥാസന്ദർഭങ്ങളിൽ തദനുസാരിയായി മാറ്റങ്ങൾ വരുത്തേണ്ടിയും വന്നു. ചെറിയ ഒതുങ്ങിയ ഇടങ്ങളിലേക്ക് കഥ മാറ്റപ്പെട്ടു, ആൾക്കൂട്ടവും തെരുവ് സീനുകളും വേണ്ടെന്ന് വയ്ക്കപ്പെട്ടു. പല രംഗങ്ങളും രാത്രിയിലേയ്ക്കായി  മാറ്റപ്പെട്ടു. വി എഫ് എക്സ് എന്ന കമ്പ്യൂട്ടർ വിദ്യ അത്യാവശ്യമായി വന്നു ദൃശ്യങ്ങളുടെ ഇല്ലായ്മയെ മറി കടക്കാൻ. മുകളിൽ നിന്നുള്ള ഏരിയൽ ഷോടുകൾ കൂടുതലായി വന്നുവെന്നത് സത്യമാണെങ്കിലും രസാവഹമാണ്. കുടുംബത്തിൻ്റെ ഇഴയടുപ്പം, ഊഷ്മളബന്ധങ്ങളുടെ ഗാഢതയും ഉന്മേഷപ്രദാനവും ഒക്കെ കൂടുതലായി ആഖ്യാനത്തിൽ വന്നുചേരുകയും ചെയ്തു. വലിയ സ്പെക്റ്റക്കിൾഅപ്രത്യക്ഷവും അനാവശ്യയുമായി, അവയില്ലാതെ പ്രേക്ഷകരെ പിടിച്ചിരുത്താമെന്ന് സംവിധായകർ തെളിയിക്കുകയും ചെയ്തു. തിയേറ്ററുകൾ അടച്ചതോടേ വലിയ വിവാദങ്ങളോടെ ഒ റ്റി റ്റി റിലീസുകളിലേക്ക് സിനിമകൾ സ്ഥാനാന്തരണം ചെയ്തു. സിനിമയുടെ ദൃശ്യപരത ഒട്ടേറെ മാറ്റങ്ങൾക്ക് വിധേയമായത് വിപ്ളവാത്കമായി. മൊബൈൽ ഫോണിലോ കമ്പ്യൂടർ സ്ക്രീനിലോ സിനിമ കാണുക എന്ന നൂതന രീതിയോട് സമരസപ്പെട്ടു പ്രേക്ഷകർ, തിയേറ്ററിൽ സിനിമ കാണുന്നതിനു മുൻപിലുള്ള മാനസിക തയാ റെടുപ്പകൾ ഇല്ലാതായി. സിനിമയെ സമീപിക്കുന്ന രീതിയിത്തന്നെ വൻ പരിവർത്തനങ്ങൾ അറിയാതെ തന്നെ വന്നുകയറി.  നാം നോക്കുന്ന കമ്പ്യൂടർ സ്ക്രീനിൽ മറ്റൊരു കമ്പ്യൂടർ സ്ക്രീൻ പ്രത്യക്ഷപ്പെട്ട് കഥ പറയുന്ന സീ യു സൂൺപോലെത്ത സിനിമ പ്രേക്ഷകപ്രീതി നേടിയത് ഈ മാറ്റങ്ങളെ സ്വാംശീകരിച്ച്തിൻ്റെ ഉത്തമ ദൃഷ്ടാന്തമാണ്.   

 തിയേറ്റർ അനുഭവം എന്നത് 

 ശബ്ദത്തിൻ്റെ പ്രകടനപരമായ വിന്യാസങ്ങൾ സൃഷ്ടിക്കുന്ന മായാജാലം പ്രധാന ആകർഷണമാണ് തിയേറ്ററിൻ്റേത്. കൂട്ടായുള്ള ആഘോഷപ്രതീതിയും ഇത് സൃഷ്ടിയ്ക്കുന്നു എന്നത് ചെറുപ്പക്കാരെ കൂടുതലായി തിയേറ്ററിൽ എത്തിയ്ക്കുന്നു എന്നത് സാമ്പത്തികവിജയത്തിൻ്റെ സുനിശ്ചിത ഘടകവുമാണ്. തിയേറ്ററോ  ഒ റ്റി റ്റിയോ എന്ന ദ്വന്ദം വിപരീതഭാവത്തോടെ ഉടലെടുക്കുന്നതും ഈ പര്യാലോചനയെ സംഘർഷത്തിൽ എത്തിക്കുകയും ചെയ്യുണ്ട്. ഈ ആഴ്ച്ച ദുൽക്കർ സല്മാൻ്റെ സല്യൂട്ഒ റ്റി റ്റിയിൽ മാത്രം റിലീസ് ചെയ്യുന്നതു കൊണ്ട് തിയേറ്റർ സംഘടന ആ നടൻ്റെ ഒരു സിനിമയും തിയേറ്ററിൽ റിലീസ് ചെയ്യപ്പെടുകയില്ല എന്ന വാശിയിലായത് ഉദാഹരണം.  തിയേറ്റർ അനുഭവം പലപ്പോഴും ദുരനുഭവം ആകാറുണ്ട്, ഫാൻ ക്ളബ്ബുകാരുടെ അതിരുകടന്ന ആഹ്ളാദപ്രകടങ്ങളും ചെയ്തികളും പാലഭിഷേകവും മറ്റും, അമിതമായ മൊബൈൽ ഫോൺ ഉപയോഗം ഇവയൊക്കെ ഒരു വലിയ വിഭാഗം പ്രേക്ഷകരെ തിയേറ്ററിൽ നിന്ന് അകറ്റി സ്വന്തം ഇടത്തിലേയ്ക്ക് സിനിമയെ സ്ഥാനാന്തരണം ചെയ്യിച്ചിട്ടുണ്ട്.  തിയേറ്റർ സൗകര്യങ്ങളെ വീട്ടിൽ എത്തിയ്ക്കുൻ ഹോം തിയേറ്റർ സൗകര്യങ്ങളും വ്യാപകമാകുന്നുണ്ട്. സിനിമയുടെ ദൃശ്യപരതയേയും ആഖ്യാനരീതികളെയും ഇവ ഒക്കെ സ്വാധീനിച്ചു കഴിഞ്ഞു എന്നത് പോസ്റ്റ്-കോവിഡ് സിനിമകളിൽ തെളിഞ്ഞു കാണുന്നുണ്ട്. മൊബൈൽ ഫോണിലോ കമ്പ്യൂടർ സ്ക്രീനിലോ പ്രദർശിതമാക്കുന്ന രംഗങ്ങൾക്ക് ഏകാഗ്രത നൽകേണ്ടത് അത്യാവശ്യമാണെന്ന് സംവിധായകർ നന്നായി പഠിച്ചും തുടങ്ങി.

 സംവിധായകർ -പുതിയവരുടെ തൻ്റേടം

   ഈ വാതാവരണത്തോട് എളുപ്പം ഇണങ്ങിയത് പുതിയ സംവിധായകർ ആണെന്ന് പറയാം. ജാൻ എ മൻഉമായി ചിദംബരം, ആർക്കറിയാംഉമായി സനു ജോൺ വർഗീസ്, ‘തിങ്കളാഴ്ച്ച നിശ്ചയംഉമായി സെന്ന ഹെഗ്ഡേ,  ഒക്കെ ചെറു സ്ക്രീനുകളോടോ കോവിഡ് പരിമിതികളോടോ ഇണക്കി സിനിമ നിർമ്മിച്ചെടുത്തവരാണ്, പ്രേക്ഷകരെ തൃപ്തിപ്പെടുത്താനും കഴിഞ്ഞു അവർക്ക്. നവാഗതരായ അഷ്രഫ് ഹംസ (ഭീമൻ്റെ വഴി), വിഷ്ണു മോഹൻ (മേപ്പടിയാൻ)  ഗിരീഷ് എ ഡി (സൂപ്പർ ശരണ്യ) ഷൈജു ഖാലിദ് (ലൗ) എന്നിവരൊക്കെ ഒരു സിനിമയുടെ മാത്രം പരിചയവുമായി വന്ന് സ്വീകരണശേഷിയുള്ള സിനിമകൾ നിർമ്മിച്ചവരാണ്. കോവിഡ് കാലം അതിജീവിച്ച സിനിമകൾ സംവിധാനം ചെയ്തവർ. വെല്ലുവിളികൾ സ്വാംശീകരിച്ച് രൻജിത് ശങ്കറും അമൽ നീരദും ബി. ഉണ്ണികൃഷ്ണനും  ദിലീഷ് പോത്തനും  മഹേഷ് നാരായണനും ജിത്തു ജോസഫും  പൃഥ്വി രാജും ബേസിൽ ജോസഫും (മിന്നൽ മുരളി)യും എത്തി.  കൂടുതലും ഒരു കാർ ഓടിയ്ക്കുന്ന രംഗളുള്ള നൈറ്റ് ഡ്രൈവ്ഉമായി വൈശാഖും തൻ്റെ സാന്നിദ്ധ്യം അറിയിക്കുന്നു.

 സണ്ണി

   കോവിഡ് കാലത്ത് തുടങ്ങി കോവിഡ് കാലത്ത് തന്നെ അവസാനിക്കുന്നകഥകൾ പ്രത്യാശയ്ക്ക് വഴിയുണ്ട് എന്ന് സൂചിപ്പിക്കുന്നവയാണ്.  രഞ്ജിത് ശങ്കറിൻ്റെ സണ്ണി കോവിഡ് മഹാമാരിയുടെ എല്ലാ ദുരന്തങ്ങളും കെടുതികളും ഒരു മുറിയിൽ ഒരാൾക്ക് സംഭവിക്കുന്ന ദുർഘടങ്ങളിലൂടെ ആഖ്യാനിക്കപ്പെടുകയാണ്.   വൻസമൂഹത്തിൻ്റെ  കെടുതികൾ ഒരാളിലേക്ക് ചുരുക്കി ആന്തരവൽക്കരിക്കപ്പെടുന്നു ഇവിടെ.   ക്വാ റൻ്റൈൻ  കാലത്ത് സ്വന്തം ജീവിതത്തിലേക്ക് തിരിഞ്ഞുനോക്കേണ്ടതിൻ്റെ ആവശ്യകത നിജപ്പെടുത്തുന്നതിനോടൊപ്പം ദൗർഭാഗ്യകാലത്ത് ശുഭോദർക്കമായ ചിന്തകൾ ആത്മസുധാരണത്തിനു വഴിവയ്ക്കുകയും ചെയ്യുമെന്ന് സിനിമ സൂചിപ്പിക്കുന്നു. ദാമ്പത്യേതരബന്ധങ്ങളും സാമ്പത്തികത്തിരിമറിവുകളും ഒറ്റപ്പെടുത്തി അതിനുമേൽ കോവിഡ് ഏകാന്തവാസം വിധിയ്ക്കുമ്പോൾ സണ്ണി ആത്മഹത്യക്കൊരുമ്പെടുകയാണ്. അയാൾക്ക് വരുന്ന ഫോൺ വിളികൾ വഴിയാണ് സിനിമ കഥ പറയുന്നത്. കോവിഡ് അസുഖം അയാൾക്കുള്ള ശിക്ഷയാണ്, പക്ഷേ പാപവിമുക്തിയ്ക്ക് വഴിയുണ്ട്. ‘This too shall pass’ എന്നൊരു സന്ദേശം അയാളുടെ ഫോണിൽ വരുന്നത് വ്യക്തമായി കാണിച്ച് സിനിമ ഉദ്ദേശം വെളിവാക്കുന്നു എന്ന് കരുതാം. കോവിഡ് ബാധയുടെ സമൂലകത സണ്ണിയുടെ മാനസികവ്യാപാരത്തിലൂടെ വിദിതമാകുന്നു. മാനസികാാഘാതത്തിനു ഒരു ദാർശനികമാനം നൽകാനുള്ള ശ്രമമുണ്ടിവിടെ.

ആർക്കറിയാം

     കോവിഡ്  പകർച്ചവ്യാധി ഏൽപ്പിക്കുന്ന പരിക്കുകളുടെ പരിണതി     ജീവിതസന്ദർഭങ്ങളെ  ബാധിയ്ക്കുന്നത് കഥയുടെ വഴിത്തിരിവുകളാണ് സനു ജോൺ വർഗീസിൻ്റെ ആർക്കറിയാംഇൽ.   റ്റെലിവിഷനിൽ വരുന്ന കോവിഡ് വാർത്തകൾ പലപ്പോഴും ആഖ്യാനത്തിനു ഉപയോഗിക്കുന്നുണ്ട്.  പാൻഡെമിക് പകർന്നു തുടങ്ങുന്ന കാലഘട്ടമാണ്, മാസ്ക് ഉപയോഗം പ്രചാരത്തിൽ വന്ന് തുടങ്ങിയിട്ടുണ്ട്. പക്ഷേ സിനിമ ഷൂടിങ് കോവിഡ് പ്രചണ്ഡമായ തേർവാഴച്ച നടത്തിയിരുന്നപ്പോൾത്തന്നെ. എന്നാലും കാലഘട്ടത്തിൻ്റെ സൂചന്യ്ക്കു വേണ്ടി മാത്രമല്ല കോവിഡ് വ്യാധിയെ ഉപയോഗിച്ചിരിക്കുന്നത് തീർച്ചയാണ്.  കുടുംബബന്ധങ്ങളെ ഉറപ്പിച്ചുനിർത്താനുള്ള ഉപാധി- ഒരു ബാഹ്യസ്വരൂപ വിപത്തി-   എന്ന നിലയിലാണ്. പാപവും മുക്തിയും ഇവിടെയും  ചർച്ച ചെയ്യപ്പെടുന്നുണ്ട്. കോവിഡ് കാലത്തെ ദുർഘടങ്ങൾ മാറിക്കിട്ടി സ്വസ്ഥജീവിതം തുടരുന്നു എന്ന ശുഭോദർക്കസൂചനയോടെയാണ് സിനിമ അവസാനിക്കുന്നത്. 

സീ യു സൂൺ

സൂക്ഷ്മതരമായ നിർമ്മിതിയിലൂടെ ഒരു മഹാമാരിക്കാലത്ത് ഉദ്ദിഷ്ടസിദ്ധിസാധകമായി പ്രേക്ഷകരോട് സംവദിച്ച സിനിമയാണ് മഹേഷ് നാരായണൻ്റെ സീ യു സൂൺ‘. കോവിഡ് കാലത്ത് സംഭവിക്കുന്ന കഥയൊന്നുമല്ല ഈ സിനിമയിൽ, എക്കാലവും നടക്കാവുന്നതാണ്. ആധുനിക സംവേദനസാദ്ധ്യതകൾ ഉപയോഗിച്ച് മനുഷ്യർക്ക് അടുത്തിടപഴകാൻ സാദ്ധ്യതെയേറെയാണ് ഇക്കാലത്ത്. മൊബൈൽ ഫോൺ വഴി ബന്ധങ്ങൾ സൃഷ്ടിക്കപ്പെടുന്നതും ചതിയിൽ അകപ്പെടുന്നതും ബന്ധങ്ങൾ മുറിയുന്നതും സ്ഥിരം വാർത്തകളായ ഇക്കാലത്ത് അതിൻ്റെ ദൃശ്യപ്പെടുത്തൽ എങ്ങനെ സിനിമാറ്റിക് ആക്കി മാറ്റാമെന്നുള്ള വെല്ലുവിളിയാണ് സംവിധായകൻ ഏറ്റെടുത്തിരിക്കുന്നത്. പ്രതികൂലാവസ്ഥകളിലും സിനിമ എന്ന വിനോദോപാധി അനുസ്യൂതം തുടരാമെന്നുള്ളതിൻ്റെ തെളിവ്. മൊബൈൽ ഫോൺ ദൃശ്യങ്ങളും ലാപ് റ്റോപിൽ തെളിയുന്ന പ്രതിഛായകളും മാത്രം ഉപയോഗിച്ചാണ് ആഖ്യാനം. പെരുമാറ്റങ്ങളും യാത്രകളും അന്യോന്യസംബന്ധങ്ങളും കണിശമായി പ്രതിബന്ധിതമാക്കപ്പെട്ട കാലത്ത് ഉദ്വേഗജനകമായ രംഗങ്ങൾ ഉൾപ്പെടുത്തി എങ്ങനെ സിനിമ നിർമ്മിച്ചെടുക്കാമെന്നതിൻ്റെ ഉദാത്ത ഉദാഹരണമാണീ സിനിമ. ബാംഗളൂരിലും ദുബായിയിലും കേരളത്തിലുമായി കഥ നടക്കുന്നു എന്ന്  വിശ്വസിപ്പിക്കുന്നുണ്ട് പ്രേക്ഷകനെ. കമ്പ്യൂടർ വിദ്യയുടെ ആൽഗൊ റിതമുകൾ ഉപയോഗിച്ച് ഡിറ്റെക്റ്റീവ് പണികൾ സാധിച്ചെടുക്കാമെന്ന് തെളിയിക്കപ്പെട്ടിട്ടുള്ള ഇക്കാലത്ത് ദൂരെയിരുന്ന് ചെയ്ത് തീർക്കാവുന്ന കാര്യങ്ങൾ നിരവധിയാണെന്ന് സിനിമ പറഞ്ഞുതരുന്നുണ്ട്. വില കൂടിയതും സങ്കീർണ്ണ സാങ്കേതികതാനിബദ്ധവുമായ ക്യാമെറകൾ അത്ര അത്യാവശ്യമല്ലെന്നും മൊബൈൽ ഫോണോ ലാപ് റ്റോപോ ഉപയോഗിച്ച്  സിനിമാ ആലേഖനം സാദ്ധ്യമാണെന്നും കോവിഡ് വെല്ലുവിളികൾ പഠിപ്പിച്ചു തരുന്നു.

  ലൗ LOVE

     ഖാലിദ് റെഹ് മാൻ്റെ ഈ സിനിമ തികച്ചും വളരെ പരിമിതമായഒരിടത്ത്-ഒരു ഫ്ളാറ്റിനുള്ളിൽ മാത്രം-സംഭവിക്കുന്ന രീതിയിൽ രചിക്കപ്പെട്ടതാണ്. കോവിഡ്കാല പരിമിതികളെ മറികടക്കാൻ ഒരു പോംവഴി ഇതു തന്നെ-ചെറിയ ഒരിടം നിജപ്പെടുത്തിക്കൊണ്ട് അവിടെ വൻ നാടകീയതയും സംഘർഷാവസ്ഥയും സാധിച്ചെടുക്കുക എന്നത്. ഫ്ലാറ്റിനുള്ളിൽ പ്രവേശിക്കാനുള്ള കതകും രണ്ട് മുറി കളുടേയും കുളിമുറികളുടേയും കതകുകളും അടയ്ക്കുകയും തുറക്കുകയുംചെയ്തുകൊണ്ട് ഭ്രമാത്മകത സൃഷ്ടിയ്ക്കപ്പെടുന്നുണ്ട്. നായകൻ്റെ ഫാൻ്റസികളും ഇതിനോട് ചേരുമ്പോൾ ഇടം എന്നതിൻ്റെ പരിമിതി വിസ്മൃതമാകുകയാണ്. കഥാപാത്രങ്ങളുടെ എണ്ണവും പരിമിതപ്പെടുത്തിയിട്ടുണ്ട്. ഒരു സമ്പൂർണ്ണ ലോക് ഡൗൺ നിർമ്മിത സിനിമ തന്നെയാണ് ലൗ‘. ചടുലമായ ആഖ്യാനം തന്നെ വിശ്വസനീയത നൽകുന്നത്.   

      ഇതുപോലെ ജോജി (ദിലീഷ് പോത്തൻ ) യും ഇടം ചുരുക്കി നിജപ്പെടുത്തിയ സിനിമ ആണ്. ഒരു വീടും ചുറ്റുമുള്ള സ്ഥലങ്ങളും മാത്രം ദൃശ്യപ്പെടുത്തി ആഖ്യാനം അതിനനുസരിച്ച് വ്യവസ്ഥപ്പെടുത്തിയിരിക്കുന്നു. കുരുതി, ബ്രോ ഡാഡി, കോൾഡ് കെയ്സ് ഒക്കെ കോവിഡ് കാലത്ത് അതിൻ്റ്തായ ക്രമപ്പെടുത്തലോടേ ഷൂട് ചെയ്തതാണ്. 

മിന്നൽ മുരളി

  ഒരു അതിമാനുഷൻ മനുഷ്യകുലത്തെ രക്ഷിക്കാൻ അവതരിക്കുന്നത് പാശ്ചാത്യസിനിമകളിൽ പണ്ടേ പ്രത്യക്ഷപ്പെട്ട പ്രമേയമാണ്. മലയാളത്തിൽ ആദ്യമായാണ് ഇങ്ങനെ ഒരു സൂപർ ഹീറോ പ്രത്യ്കഷപ്പെടുന്നത്. കോവിഡ് വ്യാപിക്കുന്നതിനു മുൻപേ നിർമ്മാണം തുടങ്ങിയതാണ് ഈ സിനിമ എങ്കിലും കോവിഡ് കാലത്ത് പ്രധാന രംഗങ്ങൾ ചിത്രീകരിക്കേണ്ടി വന്നിട്ടുണ്ട്. വളരെ സ്വീകാര്യത നൽകി ആഘോഷിക്കപ്പെട്ടു മിന്നൽ മുരളി. ദൈന്യതയും അരക്ഷിതാവസ്ഥയും മറി കടക്കാനും പ്രസന്നവും സ്വച്ഛവും ആയ ഭാവി വാഗ്ദാനം ചെയ്യാനും ഒരു അതിമാനുഷൻ നമുക്കിടയിലേക്ക് ഇറങ്ങി വരുന്നു എന്ന സങ്കൽപ്പം കോവിഡ് ആഘാതത്തിനു ശേഷം അത്യാവശ്യവും അതിജീവനത്തെ പ്രോൽസാഹിപ്പിക്കുന്നതുമാണ്. ഒരു സാധാരണ തയ്യൽക്കാരനാണ് മിന്നൽ മുരളി ആയി സ്വരൂപാന്തരണം സംഭവിച്ച് ധർമ്മസംസ്ഥാപനം സാധിച്ചെടുക്കുന്നത്. അമേരിക്കയ്ക്കു പോകാൻ ഷർട് തയ്പ്പിച്ച് കാത്തിരിക്കുന്നവൻ അത് വേണ്ടെന്നു വെച്ച് നമ്മോടൊപ്പം അതിശക്തിയോടെ നിൽക്കുമെന്ന് വാഗ്ദാനം ചെയ്യുന്നത് ആത്മഋണമുക്തിയ്ക്കും സുധാരണത്തിനും വഴിതളിയ്ക്കുന്നതാണ്.  മിന്നൽ മുരളിയുടെ സ്വീകാര്യതയുടെ പിന്നിൽ ഇത്തരം പ്രീതീകരശുഭചിന്തകളാണ്.

  പൊതുവേ സന്തോഷാനുഭവ ( feel good ) സിനിമകൾക്ക് തന്നെയാണ് ഇക്കാലത്ത്       പ്രിയമേറുന്നത്.  ഭീമൻ്റെ വഴിഅപ്രതിഹതനായ വില്ലൻ ജീവിതത്തിൻ്റെ വഴിമുടക്കുമ്പോൾ അയാളെ മലർത്തിയടിച്ച് അതും ഒരു സ്ത്രീ-മുന്നോട്ടുള്ള യാത്ര സുഗമമാക്കപ്പെടുന്ന കഥയുടെ ആവിഷ്ക്കാരമാണ്. ഒരേ ഒരു ലൊക്കെഷനിൽത്തന്നെയാണ് സിനിമാചിത്രീകരണം നടന്നിരിക്കുന്നത്. ഇത് ഒരു പരിമിതിയായി തോന്നിപ്പിക്കുന്നതേ ഇല്ല. ജാൻ എ മൻബന്ധങ്ങളുടെ പരിപാലനവും ഊഷ്മളതയും എത്രയും ആവശ്യകരമാണ് എന്നത് വെളിവാക്കുന്ന പ്രമേയം ആധാരമാക്കിയിട്ടുള്ളതാണ്. നേരെ എതിരെയുള്ള രണ്ട് വീടുകളിൽ നടക്കുന്ന സംഭവങ്ങൾ മാത്രമായി ഇടങ്ങൾ ചുരുക്കപ്പെട്ടിരിക്കയാണ്. വളരെ ചെറുപ്പക്കാരായ ചിദംബരവും സഹോദരൻ ഗണപതിയുമാണ് ഈ സിനിമയുടെ ആവിഷ്ക്കാരകർ.  ഒറ്റപ്പെട്ട് പോയവരുടെയും മാനസികസംഘർഷകാരണങ്ങളാൽ വിഷാദരോ ഗത്തിലേക്ക് വഴുതിവീഴുന്നവരുടെയും ആനന്ദോൽക്കർഷങ്ങൾക്ക്  ബന്ധുക്കളും സുഹൃത്തുക്കളുമൊക്കെയായി കൂട്ടു ചേരൽ എത്ര അത്യാവശ്യമായിരിക്കുന്നു മഹാമാരിയിൽ നിന്ന് വിമുക്തി നേടിക്കൊണ്ടിരിക്കുന്ന ഈ സമയത്ത് എന്നത് കൃത്യമായി രേഖപ്പെടുത്തുന്നു ജാൻ എ മൻ‘. ‘ഹോംഎന്ന സിനിമയും കുടുംബത്തിൻ്റെ ഇഴയടുപ്പം ആത്മനവീകരണത്തിനു തുണയേകുന്നത് ആധാരമാക്കുന്നുണ്ട്. .സൂപർ ശരണ്യയുടെ പ്രേക്ഷകപ്രീതിയ്ക്ക് പിന്നിലും ഇതേ തത്വങ്ങൾ ഇഴ പാകിയിട്ടുണ്ട്.  കുറ്റം ചെയ്തവനാണെങ്കിലും കൊല്ലപ്പെട്ടവൻ്റെ ആത്മാവിനു നീതി കിട്ടട്ടെയെന്ന് ആശംസിക്കുന്ന രീതിയിൽ കഥാന്ത്യം വികസിപ്പിച്ചെടുത്ത ദൃശ്യം 2ഉം കോവിഡ് ബാധയിൽ നിന്ന് വിമുക്തി നേടിക്കൊണ്ടിരിക്കുന്ന സമൂഹത്തിനു ആശ്വാസമരുളിയിട്ടുണ്ട്. അജഗജാന്തരംകോവിഡ് ആഘാതത്തിനു മുൻപേ നിർമ്മിച്ചതാണെങ്കിലും പരക്കെ കാണികൾ സ്വീകരിച്ചതാണ്. യുക്തിരഹിതമായ ഹിംസയും ക്രൗര്യവും നിറഞ്ഞതാണെങ്കിലും ആൾക്കൂട്ട-ഉൽസവ ദൃശ്യങ്ങൾ ചില ഗൃഹാതുരത്വനിറവേറ്റലുകൾ സാധിച്ചെടുത്തതാവണം ഈ പ്രീതിയുടെ പിന്നിൽ.

ഭീഷ്മപർവ്വവും ആറാട്ടും-നിരാകരിക്കപ്പെടുന്ന സ്റ്റാർഡം

  സൂപർ സ്റ്റാറുകൾ എന്ന സങ്കൽപ്പം കാലഹരണപ്പെട്ട് തുടങ്ങി എന്ന് മനസ്സിലാക്കി അത് പുനഃസ്ഥാപിക്കാൻ സാദ്ധ്യമല്ലെന്ന് മനസ്സിലാക്കി പഴയ സംവിധായകർ തങ്ങളുടെ ദീനത ഒരു ഓർമ്മപ്പെടുത്തൽ പോലെ അവതരിപ്പിച്ചിരിക്കയാണ് ഈ രണ്ട് സിനിമകൾ വഴി. ആറാട്ടിൽ അത് വളരെ വ്യക്തമാണു താനും. ഫാൻപറ്റങ്ങളെ മേച്ചു നടന്ന സ്റ്റാറുകൾ പുതിയ ആസ്വാദകജനത വന്നണഞ്ഞത് ഉള്ളിൽത്തട്ടി നിരാകരിക്കൽ (  denial ) എന്ന മാനസികാവസ്ഥയിൽ എത്തിയതിൻ്റെ ദൃഷ്ടാന്തമാണ് ഭീഷ്മപർവ്വവും ആറാട്ടും. ബി. ഉണ്ണികൃഷ്ണൻ മോഹൻ ലാലിനെക്കൊണ്ട് ആറാട്ടിൽ ചെയ്യിച്ചതൊക്കെ മൺമറഞ്ഞുപോയ മാനെറിസത്തെ  പിടിച്ചുനിറുത്താൻ ദയനീയമായി ശ്രമിച്ചതിൻ്റെ ഉദാഹരണമാണ്. മുണ്ട് വീശി മാടിക്കുത്തുന്നതും വാദ്യകോലാഹലത്തോടെ നടന്നടുക്കുന്നതും ഇനിയും ചിലരെ മോഹമുഗ്ധരാക്കും എന്ന് വിചാരിച്ചിരിക്കുന്നു പാവം സംവിധായകൻ. അമൽ നീരദ് ഒരേ  റൂട്ടിലോടുന്ന ബസ് ആയിത്തീർന്നിരിക്കുന്നു എന്ന് സ്വയം വിളംബരം ചെയ്യുകയാണ് മമ്മുട്ടിയെക്കൊണ്ട് പണ്ട് ചെയ്യിച്ചതൊക്കെ വീണ്ടും വൃഥാ ആവർത്തിച്ചുകൊണ്ട്. ഗോഡ്ഫാദർ അതേ എഫക്റ്റോടെ  റിമേയ്ക്ക് ചെയ്ത് , മമ്മുട്ടി കാലിന്മേൽ കാൽ കയറ്റിവെച്ച് സ്റ്റൈലിൽ സിഗററ്റ് വലിച്ചാൽ ഇനിയും പ്രേക്ഷകർ അതിൽ വീണുപോകും എന്ന് വിശ്വസിച്ചു പോയ നിഷ്ക്കളങ്കമനസ്കൻ ആയിരിക്കുന്നു അമൽ നീരദ്.  ചെണ്ടകൊട്ടിയും പാലഭിഷേകം ചെയ്തും തിയേറ്റർ റിലീസ് ആഘോഷിക്കുന്ന ഭ്രാന്തൻ ഫാൻസിനെ അല്ല ഇവർ ടാർഗറ്റ് ചെയ്യേണ്ടത് എന്ന് മറന്നു പോയോ എന്തോ ഇവർ. മമ്മുട്ടിയോടൊപ്പം കൊച്ചു പയ്യനായി അഭിനയിച്ചിട്ടുള്ള ഗണപതി ഇന്ന് ഏറ്റവും മികച്ച സ്ക്രിപ്റ്റുമെഴുതി പ്രേക്ഷകരെ കയ്യിലെടുത്ത കാലമാണിത് (ജാൻ എ മൻ). കോവിഡാനന്തര സിനിമ എന്താണെന്ന് ഈ സംവിധായകർ മനസ്സിലാക്കി വരുന്നതേ ഉള്ളു എന്ന് വിചാരിക്കേണ്ടിയിരിക്കുന്നു.

പുതിയ ക്രമീകരണങ്ങൾ

       പാൻഡെമിക്കിൻ്റെ വെല്ലുവിളികളെ അതിജീവിക്കാൻ ചില പ്രത്യേക ക്രമാന്തരണങ്ങൾ ഉപയുക്തമാക്കി എന്നത് ശ്രദ്ധാർഹമാണ്. ഇടങ്ങളെ ചുരുക്കിയെടുക്കുക എന്നതാണ് പ്രാമുഖ്യമേറിയത്. ആഖ്യാനത്തിൻ്റെ വേഗത വർദ്ധിപ്പിച്ചും സംഘർഷാത്മകതയ്ക്ക് ഊന്നൽ നൽകുകയും ചെയ്താണ് ഈ പരിമിതിയെ മറികടക്കാൻ നിയുക്തമാക്കിയ ഒരു ആവിഷ്ക്കാരതന്ത്രം. ഊഷ്മളബന്ധങ്ങൾ പുനഃസ്ഥാപിക്കുന്ന രീതിയിൽ കഥ വികസിപ്പിക്കുക, കുടുംബത്തിൻ്റെ സ്നേഹച്ചങ്ങലകൾ ദൃഢമാക്കുന്ന രീതിയിൽ രംഗങ്ങൾ ഒരുക്കുക ഇവയൊക്കെ മരണഭീതിയിലോ ദുരിതസങ്കടങ്ങളിലോ ആഴ്ന്നു പോയവർക്ക് ആശ്വാസമരുളും എന്ന് പെട്ടെന്ന് തന്നെയാണ് സിനിമക്കാർ മനസ്സിലാക്കിയെടുത്തത്. ശുഭോദർക്കരീതിയിൽ സിനിമ അവസാനിപ്പിച്ച് പ്രേക്ഷകർക്ക് സന്തോഷം പകരുക എന്നത് ഒരു പ്രധാനോദ്ദേശം തന്നെ ആയിരുന്നിരിക്കണം. ചെറുതല്ലാത്ത രീതിയിൽ പ്രാണോൽസാഹപ്രദാനം ചെയ്തിട്ടുണ്ടാവണം, പുനർധൈര്യം മനസ്സിൽ നി റച്ചിട്ടുണ്ടാവണം.

 

  റഷ്യൻ ആക്രമണം-കലാവിഷ്ക്കാരങ്ങളിൽ വിപര്യയസാദ്ധ്യത

     യുദ്ധങ്ങൾ എന്നും കലയേയും സാഹിത്യത്തേയും ബാധിച്ചിട്ടിട്ടുണ്ട്. രണ്ടാം ലോക മഹായുദ്ധത്തിനു ശേഷം സിനിമ ആകപ്പാടെ മാറിയത് - സംവേദനത്തിലും ആസ്വാദനശീലങ്ങളിലും ആവിഷ്ക്കാരപദ്ധതികളിലും-ചരിത്രം.  പാൻഡെമിക്കിൻ്റെ ദുഷ്കൃതങ്ങളിൽ നിന്ന് സാവധാനം പു റത്തുകടക്കുന്ന ലോകജനതയുടെ മേൽ യുദ്ധം എന്ന, വൈറസിനേക്കാൾ നാശകാരിയായ മനുഷ്യശീലം വൻ ആഘാതമാണ് ഉളവാക്കിയിരിക്കുന്നത്. ഉക്രെയിനുമേൽ നടത്തുന്ന അധിനിവേശം ക്രൗര്യമാണ് ഏറ്റവും വലിയ വിനാശകാരി എന്ന് വീണ്ടും തെളിയിക്കുന്നു. യുദ്ധം പഴഞ്ചൻ ആശയമെന്ന് തള്ളിക്കളയാൻ ഒരുമ്പെട്ടതാണ് ചിന്തകർ. പോസ്റ്റ് ഹ്യൂമനസിത്തിൻ്റെ കാലമാണെന്ന് തെറ്റിദ്ധരിച്ചു അവർ.  കോവിഡ് അനുഭവം മനുഷ്യരെ ചില പാഠങ്ങൾ പഠിപ്പിച്ചു എന്നും മറ്റും വെറുതേ പ്രത്യാശിച്ചു പാവം മാനവഹൃദയം. സിനിമയുടെ ഉള്ളടക്കവും അന്തർവസ്തുവിഷയങ്ങളും ആസ്വാദനപരതയും ഇനിയും മാറപ്പെടാൻ പോവുകയാണ്. വൈറസ് അല്ല മാനവരാശിയ്ക്ക് ഭീഷണി, മനുഷ്യർ തന്നെയാണ് എന്ന് വീണ്ടും ഓർമ്മപ്പെടുത്തൽ ആഖ്യാനങ്ങളിൽ നി റഞ്ഞു നിന്നേയ്ക്കാം. സുരക്ഷിതനല്ല എന്ന ഭീതി സിനിമാ ആവിഷ്ക്കാരങ്ങളിൽ സ്വരൂപം മാറി ആവേശിച്ചേയ്ക്കാം.